BlogFeaturedSociety

Carnaval di Aruba

Reading Time: 5 minutes<br><br>

Origen
Nos tur sa na Aruba kico ta carnaval: e temporada dushi unda cu tur hende ta festeha, bai wak nan parada, canta nan Calypso, canta nan Roadmarch, canta Tumba, wak ellecion i mucho mas. Pero abo sa di unda tur e festehamento aki bin? Kico ta su origen? Kico ta su nificacion? Mi ta contento cu bo ta lesa e articulo aki.

Pa mi por duna un definicion n’ e ‘fiesta di carnaval’ mi mester elabora riba su origen. Carnaval ta e fiesta cu ta wordo celebra den hopi paisnan catholico, e ta un tiki ironia mirando cu e festeho ta algo pagano I toch ta wordo accepta pa misa catholico. E fiesta di carnaval ta conoci pa ta e ultimo ora nan prome cu e temporada di lent cuminsa, pa esnan cu no sa e nificacion di ‘lent’; ta nifica e tempo cu Hesus a keda den desierto pa 40 dia largo, bringando e forsa nan malevalento, pa despues por cuminsa duna les den e principio nan di ‘Dios”. Ta un tempo pa arepenti bo picanan I refleciona riba bo mes. E palabra carnaval mes ta sospecha cu a bin di e palabra: carnem levare, cu ta nifica: hiba carni fey mi, of e luga aki; e tin e number ki pa motibo den ‘lent’ hopi hende tabata rindi di come carni.

Photo by Jonathan Petit (callmepetit.com)

Carnaval di Aruba
Carnaval di Aruba a cuminsa na aña 1954 como un serie di festivalnan chikito; e realidad ta cu carnaval a cuminsa mas atras cu esey; entre 1921 cu 1924, cu e venida di refeneria a trece hopi trahadornan di Trinidad I isla nan ariba, I cu a trece e tradicion aki tambe. Na aña 1957 e parada nan a wordo organisa den e parada nan cu bo ta wak awendia.

Origen di ‘Calypso’ di nos carnaval
Pa nos papia di nos musica di carnaval nos mester papia tambe di e ‘epoca di esclavitud’. Hopi di nos ritmonan di Caribe, Sur I Medio America a yega na tin un luga na e paisnan correspondiente( Tumba, Polka, Wals, Calypso, Tango) ta di gradici na esclavitud, aunke esclavitud ta en realidad algo malo, e la trece hopi di e ritmonan aki na nos pais I e resto di paisnan tambe cu ta celebra carnaval den nan manera. Calypso(cu a origina di Trinidad) por ehempel a wordo huza hopi biaha pa communica cu otro; e esclavo nan no tabata permiti pa papia cu otro, unda cu nan tabata huza canto pa por trece nan mensahe na otro. Sigur un 100 aña pasa Calypso a wordo huza pa pasa noticia rond, mirando cu ne letranan di calypso tabata hopi dependibel, I mas cu logico nan tabata papia di problemanan cu tabata pasa rond riba e isla, incluyendo ‘corrupcion politico’. Hopi biaha Calypso ta toca den 2/4 , 4/4 of cut time, pero mi ta kere cu hopi di mi colleganan lo prefera ‘cut time’. Calypso ta bai mas atras cu solamente Trinidad, si boso ta lesando esaki I mescos n’ e momento aki scirbiendo e articulo aki scuchando ‘West African Calypso’ lo mi recomenda e lesado pa scucha esaki riba e plataformanan online. E differencia entre e calypso Africano occidental I esun di Aruba, ta scuchando hopi, mi por scucha con e clave ta sumamente varia, bayendo asina leu di toca un ‘Son clave’ den e calypso, esaki ta algo cu mi a yega di scucha na Aruba, pa esnan cu no ta compronde kico ta un son clave, e ta mas tanto e zonido: ‘tik tik tik tiktik’ den tumba.

Tumba
Nos carnaval ta incorpora, apart di Calypso I Roadmarch, tambe Tumba, aunke mi por bisa ta un lastima tin biaha bo no ta scucha nan den e parada. Mi por bisa si cu un di e nivel nan mas halto di musica den nos carnaval ta wordo demostra den tumba, pakico esaki? Ta pasobra Tumba ta evita e huzo di machine, I ta rekeri e musico ta riba un nivel basta halto pa por toca. Tumba su nivel ta bai man den man cu e nivel di Steel pan I brassband tambe, pero lastimamente ta mirando menos di e grupo nan aki riba caya. E differencia entre Tumba di carnaval cu tumba folklore ta uno hopi intressante. Un gran parti di ‘tumba folklore’ bo ta sinti e accento semper ta cai riba conteo number 1(esaki no ta conta pa tur, pero un gran mayoria si) unda cu tumba di carnaval a desaroya mescos cu esun di corsou, riba ritmonan syncopa(ritmonan cu no ta cai riba e conteo 1) esaki ta duna un otro gevoel na e tumba. Tumba ta un arte hopi scondi, asta p’ e musiconan di Aruba, hopi musiconan no sa con pa scirbi pa trompet I trombone, cu ta rekeri un tiki studio di musica pa por desaroya esaki, pero asina mes cu nan no sa scirbi ‘e, nan sa di trece nan arreglonan di tumba na un manera extraordinario.

Aruba tin hopi rikesa den cultura, I carnaval sigur ta wordo agrega na esaki; e tin su historia. lo mi pidi e lesado lo siguiente: busca mas informacion tocante e origen di nos carnaval, esaki lo duna mas un nificacion na e celebracion maraviyoso aki I lo mustra ‘bo dicon enberdad nos carnaval ta sumamente unico. Lo mi pidi pa cualkier lesado: conserva locual mester wordo conserva den nos carnaval, pasobra hopi di e tradicionnan di carnaval mes ta muriendo, por ehempel: Steel pan.

I na final lo mi pidi cualkier lesado, pa disfruta di e temporada aki te lo maximo.

Leave a comment