Art Fashion tawata sigur uno inolvidabel! Un anochi yena cu moda, arte y musica, unda diferente artista a uni y ilustra nan talento den arte, creatividad y conscientisacion. E tema e aña aki tawata “Speak up”. A presenta temanan riba diferente topico manera; Discrimination, Women Empowerment, Mental Health, Body Shaming, e situacion na Venezuela y mucho mas.
E motibo pa haci un “moda cu un causa” ta pa trece mas conscientisacion den nos comunidad. Ta bon pa nos como ser humano wordo recorda kico ta pasa rond di mundo. Di e forma aki por habri wowo pa realidad, por crea mas conversacion, intercambia opinion y stimula un y tur pa conscientemente para pa un causa.
Di comienso te na fin e publico a gosa di entretenimiento tremendo di diferente show di diseñador di moda como tambe cantante manera Lily Rogers. Presentacion escenico tawata na encargo di Freddy Montoya.
Loretti Design a presenta su coleccion titula BOLD. Tawata trata di un concepto unda acesorio moderno, oversized cu hopi detaye a forma un coleccion perfecto pa e ser feminino clasico y moderno.
Diseñadora di hoya Gloria Filiciana a crea cu su tema “sustainability” un colection bunita unda prendenanan tabata traha na man y ‘Eco-friendly’ . Un creacion nechi cu a atrae di leu.
Maria Magdalena Gonzalez a sorprende tur hende cu su presentacion yama “Un grito de esperanza”. Un show impactante cu a representa e realidad di e situation na Venezuela, ilustra di manera artistico, creativo pero alabes emocional.
Elle Juelz tambe tawata un di e puntonan culminante di e anochi di Art Fashion. Di ora su show a cuminsa te na final ela logra capta atencion di esnan presente. E coleccion tawata atractivo, femenino combina cu elementonan di moda urbano. E musica, energia di e modelonan y video a completa e show y su mensahe di ‘women empowerment’.
Cu su show titula ‘No na discrimicion’ Solo by Ronchi de Cuba a celebra su 30 aña di existencia den moda na Aruba cu un coleccion espectacular. Na un forma hopi creativo a sa di combina fotografia di Anuar Habibe, Damilice Mansur y David Troeger riba tela den varios diseño impactante. Algo sumamente bunita y unico. E favoritonan cu a resalta tawata e shimis cu e capel di Alto Vista y e bachi di homber cu e fotografia di un meneer para cu un background di yerba berde.
Companianan manera D-Shop, Kate Spade y Aldo Shoes tambe tawata presente. Aldo Shoes a ilustra differente sorto di sapato ilustra cu arte representando e tema di “body shaming”; topico unda ta huzga forma di curpa di e hende muhe.
Zhuzhed by Ali a hasi un tremendo trabou cu e styling di D-Shop su coleccion di paña pa hende homber y muher. Durante su show por a admira diferente combinacion y styling di paña. Tawata e proposito pa mustra cu tur hende por bisti na nan manera y por ta orguyoso di nan size, estatura y color.
E diseñadora local cu fama internacional, Gigliola tambe tawata presente na Art Fashion pa ilustra su coleccion di moda mas recien. E tawata moderno y deportivo, algo diferente pa tur esnan cu custumbra cu Gigliola su diseñonan anterior. Un creacon bunita, atletico y apto bisti pa cualkier occasion.
Francis Sling, un artista di Corsow conoci pa su arte y mural painting, tambe a participa e anochi aki. Ela crea un concepto di paña y arte cu influencianan Africano. Tawata algo creativo cu toke special di Francis su estilo di arte.
En general, e tawata un anochi exitoso cu un publico varia: di comerciante, pa caranan familiar den mundo di moda y arte, politico y un publico amplio a disfruta di e anochi. Ta prueba cu por bini hunto di diferente angulo di nos comunidad pa sostene arte na Aruba como tambe nos artistanan local.
Aruba sigur tin espacio pa mas mas evento di expresion creativo y ta di spera cu un y tur na nan forma duna aporte na dje.
