Ryan Oduber ta un artista cu a traha riba diferente tereno, di proyecto audiovisual, proyecto di arkitectura, el a produci diferente documentario nan, el a colabora cu proyecto di bario, y naturalmente a colabora varios biaha cu su casa, artista Alydia Wever. El a presenta su trabou di su carera artistico na diferente parti di mundo, manera Taiwan, Portugal, Mexico, Hulanda, Cuba y Venezuela.
Na juni 2018 nos a sinta cu Ryan den su oficina, na e momento ey na Biblioteca Nacional di Aruba. Mas cu tur cos, Ryan ta papia over di su mes como un artista contemporaneo. P’e esaki ta e tipo di arte cu ta trata polemicanan actual, esta “social issues”, cu nos ta encontra nos mes cun’e na nivel di sociedad. Nos a discuti e cambionan di e clima cultural di Aruba durante su carera, espacionan di expresion liber y e falta di esakinan, Aruba su strategia di incopora cultura den turismo y Aruba su relacion cu Venezuela, entre varios otro topico.
For di tempo cu el a caba di studia Graphic Design na Sandberg Institute na 2005, Ryan a profila su mes como un artista cu ta haci arte contemporaneo. Aunke 13 aña a pasa y hopi factor a cambia den su bida, esaki ainda ta algo central den e manera cu e ta mira y pensa over di cosnan. “Mi a realisa cu dor di mi trabou actual den gobierno, esey a haya un otro conotacion, e ta bira di un of otro manera hipocrita pa mi critica esun cu ta dunami di come. Pero mi topiconan tawata bai semper over di naturalesa y polemicanan den esaki, globalismo, pobresa, e sistema capitalista, y con nos ta bibando den dje. Aunke ainda mi tin e mesun “worries”, mi ta kere mi a bira un tiki mas voorzichtig. Pero e gana pa pinpoint cierto cosnan cu mi ta haya cu no klop y usando arte pa remedia ainda t’ey.”
Esaki no ta algo facil pa expresa den cualkier contexto y Ryan ta splica cu ora el a yega Aruba for di Hulanda na añanan 90 despues cu el a studia arkitectura, tawatin un movemento hopi particular cu a dun’e e chens pa desaroya e tipo di expresion mas critico aki. Dor cu e sector di arkitectura tawata uno dificil, Ryan a haya su mes den otro grupo di hende cu tawata bezig cu arte y el a haya interes den video design. “M’a bin ripara cu arkitectura tawata algo masha dificil mes pa drenta den dje, paso e tawata un sector domina pa un grupo di elite y tawata tin hopi politica den dje. Pero mi a ripara cu tawatin hopi movemente den e sector di cultura e tempo ey. Tawatin Instituto di Cultura, cu tawata trahando riba exposicionan di arte contemporaneo riba un base hopi regular, bou di curaderia di Elvis Lopez y bou di guia di director suplente Evelino Fingal, cu tambe a studia na un academia di arte. Evelino tawatin un relacion extenso cu organisadonan di arte den Caribe y Suramerica. E tawata compronde kico ta arte, arte contemporaneo, y su funcion. Tawatin studio-atelier Eterno di Osaira Muyale y Renwick Heronimo, y varios artista manera Glenda Heyliger y Ciro Abath tambe tawata trahando como artista contemporaneo, biahando den Caribe y Suramerica, representando Aruba. Tawatin varios galeria di arte, locual tawata kiermen mas produccion y constantemente tawatin apertura di exposicion. Un otro mundo di locual nos ta mira awo. “
Pa Ryan, esaki ta un elemento crucial cu falta na e momento aki pa expresion liber di parti di artistanan por ta posibel. “Hopi biaha otro hende ta expresa nan mes por ehempel riba facebook, cu ta algo cu no ta keda presente. Ora bo tin un di galeria di arte e idea ta keda grita por ta un luna largo. Esaki ta crea mas canal pa yega na hende, y pa refleha riba locual a wordo treci padilanti.”
Ora cu e galerianan a cera y Instituto di Cultura tawata andando cu otro prioridad, Ryan a dicidi pa bai bek Hulanda pa sigui studia, y asina el a haya su mes na Sandberg Institute. “Despues di cinco aña cu cosnan a cuminsa bira menos m’a echt sinti cu pa mi como hende y artista e challenge a stop. Mi tawatin suerte di a wordo tuma na Sandberg Institute e ora. Y ta juist dor cu mi tawata traha como artista contemporaneo kinan, mi a logra di haya un luga eynan.”
E ta splica con similar e momento di tiki inspiracion cu e la experiencia ta cu e situacion cu tin awo. Esaki ta afectando e generacion cu ta studiando y a caba di studia arte den e ultimo añanan. “Tin tiki oportunidad. Bo ta ripara cu esunan cu bin bek, cu ta pa un temporada cortico y tambe cu artista nan manera Michael Lampe, cu a prefera hopi tempo di keda cu un pia na Hulanda, un pia na Aruba. Hulanda ta mantene bo creatividad halto, tin hopi prikkels, y Aruba ta ofrece e platform caminda bo por expresa bo mes caminda hende ta compronde kico bo ta haci. Importante ta cu na e momento aki tin fondonan, mane UNOCA, cu no ta dunando e support pa artista y nan arte por crece. Cual antes si tawata e caso, tambe pa arte contemporaneo. Mi ta kere cu esaki por tin di haber cu e kennis di e bestuur, cual ta comprendibel. Si un hende no sa kico ta arte contemporaneo, ta dificil pa e por huzga corectamente over di kico ta importante pa sociedad y pa arte. E mester haci e mesun status cu musica, teatro y mester tin un balans entre e diferente tiponan di arte.”
Den su obranan Ryan a yeg’i trece padilanti cu Aruba no tin un “creative economy”. Den un entrevista na 2008 el a bisa cu un di su obra nan tawata “simbolisa nos economia casi monotono cu ta dependiento ainda y demasiado ariba e turista”. Den e ultimo añanan nos a mira algun proyectonan nobo, manera Cosecha y Carubbian Festival. Pero pa Ryan hopi a keda mescos. “Nos ta mira un fusion entre cultura y turismo e ultimo añanan, juist dor cu turismo ta hungando un rol asina impactante riba nos economia Tambe, e cultura di turismo mes a cambia. E “turista nobo” tin otro necesidad fuera di e idea di “sun, sand and sun” y esaki ta hopi mas basa riba experiencia cosnan nobo y cultura, cual a impacta e strategia di instancia nan manera ATA, cu a cuminsa wak den e rumbo ey. E jammer ta cu a focus hopi riba artesania y masha tiki riba arte contemporaneo of fine arts. Esey a crea un impresion cu artesania ta mas importante cu esakinan y cu historia di arte. Bo ta wak cu tin luga caminda cultura y economia ta draai riba arte, tin inversion y esey ta trek hende. E ta algo posibel. Na 2011, prome cu cultura a bai riba ATA su agenda, mi mes a yega di investiga e posibilidad di un museo di arte contemporaneo na Aruba. E resultado di esaki tawata cu usando un edificio interesante, no mucho grandi, y no muchu chikito, lo funciona bon. Pero na e momento ey no tawatin prioridad pa esaki, y e no a bin bek tampoco.”
E ultimo exposicion cu Ryan a forma parti di dje tawata na MACZUL, Maracaibo, yama Mare Nostrum, cu tawata bai over di relacionan entre Venezuela, Hulanda y Aruba. Ora cu esaki a tuma lugar na augustus 2017 e artistnan no tawata sa ainda cu frontera lo bai cera. “Mi kier a trata imigracion, nos geologia, nos historia cu ta conecta nos cu Venezuela y Hulanda, e indigena, y e contrabando. Pami, e exposicion aki tawata un re-encuentro cu e mundo di arte contemporaneo, cu mi coleganan, pero tambe cu e mundo di arte otro banda di e frontera. Dus ban bisa e frontera ey cu nos sa cu no ta un mundo cu nos conoce. Nos ta hopi safe aki nan. Nos ta scucha, nos ta wak, cu bibando y trahando eynan ta un otro cos. Bo ta ripara cu no matter what, toch arte ta hinca den educacion, toch arte tin un respet, toch arte ta wordo bendi y cumpra, toch arte ta biba. E visionario nan di esaki tawata Osaira Muyale y Jimmy Yanez cu hunto cu Adi Martis a mira e conexionan entre e historia di e paisnan, e formacion di e mundo nobo, e formacion di Caribe, e importancia di comercio, e crueldad di comercio, e importancia y crueldad ainda tambe di imigracion y dependencia. Esaki ta bin bek dilanti atrobe ora bo ta wak con dependiente nos ta di otro, mescos cu bo sa cu tawatin tempo cu hopi di nos famianan kier a bai biba na venezuela, anto Caracas tawata e Mecca.”
Locual a bin bek hopi dilanti durante e exposion di MACZUL tawata e relacion historico cu Aruba tin cu Venezuela y e xenofobia cu a bin hopi dilanti den e ultimo añanan riba e isla. “Ami ta wak e relacion cu nos tin cu Venezuela como algo cu ta practicamente natural. E ta forma parti di nos creolisacion, e ta forma parti di nos mutacion cultural cu nos tin cu otro, bo ta hay’e den nos genetica, y e ta bai bek te n’e comienso di civilizacion di Caribe y Suramerica. Ta dificil pa un hende demonisa e Venezolano, si e ta wak’e den su mesun curpa. Si e ta abo, bo no por demonis’e. Mi ta kere tambe cu cambio ta algo cu nos mester embrace mas. Nos tin hopi miedo di dje, pero cambio ta hinca den nos genetica, nos semper a pasa dor di dje, y nos semper a sali afo ta florece. Tin ora nos tin miedo di acepta cu e por ta un asset, e hecho cu nos ta bon den cambia, y for the best. Nos mester por tin e durf di adapta nos mes y embrace e hechonan cu nos ta bon den comunica, nos tin tur e lenguahe nan den nos curpa, nos tin tur e culturanan den nos curpa. Pesey eigenlijk mi ta kere asina hopi den arte contemporaneo, mas cu mi ta kere den artesania y folklore por ehempel. Dus ban usa nos asset nan. Asina bo ta papia di un creative island, pero un creative island cu a durf di bai all out.”
A fiercely independent human fascinated by the interaction between history, politics and economics. Chit chat with her about feminism and cats. Ultimate goal in life: engaging in decolonization.