CinematographyNews

Explosion di pelicula cortico

Reading Time: 3 minutes<br><br>

Actual tin un explosion di peliculanan cortico esta ‘short films’. Peliculnan cortico ta hopi practico, e miho manera pa cuminsa experimenta y adkiri experiencia pa cu e arte cinematografico. Pelicula cortico tambe ta mas facil pa realisa, den cine tempo ta placa y mas largo un pelicula ta, mas placa e por costa pa traha.

Mirando e desaroyo riba e tereno aki, fundacion CINEARUBA lo introduci dos plataforma cu lo yuda eleva e arte di peliculanan cortico. E prome plataforma ta uno online cu ta hiba e nomber di ‘Cinecortico’. ‘Cinecortico’ su obhetivo ta pa ‘showcase’ tur e peliculanan cortico traha na Aruba y tambe peliculanan cortico traha den exterior door di talentonan local. E iniciativa a nace door cu personanan cu peliculanan riba YouTube hopi biaha nan no ta haya e oportunidad pa ta den ‘spotlight’ y mustra nan trabao. Fundacion CINEARUBA kier trece un cambio den esaki y duna na tur persona cu ta traha peliculanan cortico e chens di bria y wordo descubri. E plataforma aki lo ta pronto disponibel riba e pagina web di CINEARUBA.

Photo by Ayrton Tromp

E otro plataforma ta e ‘short film’ festival ‘Shortcutz Aruba’ cu lo tin su primicia dia 7 di July. ‘Shortcutz Aruba’ ta forma parti di e famoso ‘Shortcutz Network’ un plataforma internacional cu festivalnan na entre otro Amsterdam, Rio, Madrid, London, Berlin, Porto. E version di Aruba lo sigui e mes un formula. Durante cada sesion cu lo tuma luga riba prome diabierna di luna, lo tin dos pelicula cortico local compitiendo. Tambe lo tin presentacion di un pelicula cortico internacional. Un invitado di e industria cinematografico lo duna un lezing. Na final di e anochi lo saca e ganador di luna cu lo sigui pa e gran final. Riba su siguiente dia e invitado lo duna un tayer riba e tereno cinematografico. E tayernan lo ta hopi util pa personanan cu kier adkiri algun conocimento prome cu traha nan peliculanan cortico pa por participa. E festival aki ta mensual y e ta duna cada persona e oportunidad pa entrega nan peliculanan cortico durante ful e aña. E gran final lo ta na januari 2018 unda cu un panel di huradonan internacional lo dicidi kendenan lo ta e ganadornan den diferente categoria. Lo tin 12 categoria di premio, for di miho actor te cu miho zonido. Prome cu e gran final lo tin un gira rond di Aruba unda cu e publico lo haya e oportunidad di vota pa e miho pelicula, premio publico. E projecto di ‘Shortcutz Aruba’ lo yuda na eleva e calidad di contenido y e calidad tecnico di cada participante. E focus ta riba talentonan emergente, profesionalnan di e industria y e amantenan di cine.

Personanan cu ta interesa den participa den ‘Shortcutz Aruba’ y ‘Cinecortico’ por manda un email na [email protected] pa mas informacion.

Leave a comment